Jamaica full a pure mixup and baggage. One country can eva inna bagga so?
Anyway yuh know mi nah call nuh name and a code di ting deh cause we nuh want get inna no hot wata. Only hot water we fi a taste a di wata we fi mix wit a likkle hot tea morning time fi buss gas.
TikTok di new pornhub?
A wah really a gwaan ova TikTok pan di Jamaica side? Every scroll yuh scroll a young, old and man weh fi know better a show up dem instrumental print? A pornhub now?
No man mi miss di days when TikTok use to be about dancing and funny videos. Dis nuh cute?
And u have di big tuff woman dem inna di comment section a lust and some a dem look like dem have big big pickney.
Do better man! Not everything unuh fi comment on. Know unuh self and leave young people tings alone. And di man dem, anuh everything unuh fi lower unuh standards dem fah fi views.
Married man dem fi behave now
A wah dat mi hear happen in St Thomas? Married man a date him wife sister and di wife drop down?
Married man dem really need fi cool down now enuh. A 2022! Why married and yuh nuh ready fi settle down?
Mi get if from good source say di married man and him wife married in 2017, but people start see him and him sister-in-law up and down when di wife gone overseas on work programme.
So people a get confuse and a wonder if a sister-in-law a try take over the man fully.
Wife here now, so you know the ting cool down now, but secret links still a make.
Anyway, hotel book and all fi dem secret dealings and di sister-in-law tell a so-called close relative say she a go weh fi weekend. When u check the levels a di wife sister and her husband a book in a hotel.
Wife get pictures and so a confirm the dealings and drop down. Hospital reach her. Big tear weh and fighting inna di St Thomas. So mi get it, a so mi sell it.
But weh mi a say, if yuh married and find out yuh love someone else, just move on nuh and divorce. A someting wrong mi a say?
That’s why murder and evil nah done because people nuh honest wit themselves man. Married from 2017, and now yuh bring disgrace.
And then what kinda sister dat? A hope the wife mek sure get a lawyer and nuh bother forgive and forget like weh sources a tell me.
PNP nah cool
Bwoy Jamaica nah no Opposition eh? The People’s National Party (PNP) weh my granny say was fi di likkle man gone, gone. Pure fighting. Dem dem really a go mek Holness get a third term just so? No likkle fight? Dem can’t unify?
Mi nah tek no side still enuh, but Holness and him party a do some good tings, but based on my likkle studies, it nuh always good fi have a likkle Opposition fi come wit some good alternatives?
So mi a beg Mark Golding and Lisa Hanna fi unify di ting man. Local Government Election a come up enuh, and we want see a likkle competition. It good fi democracy!
Anyway keeping it short and cool until a next time we comment on some hot suss a run di place.
